يهدف المنتدى لنشر هواية صيد الاسماك ومساعدة محبى رياضة صيد الاسماك فى ممارسة رياضتهم عن طريق امدادهم بالمقالات والدراسات الحديثة حول ادوات وتقنيات صيد الاسماك ونقل الخبرات من الصيادين المخضرمين الى الجدد ، كما يهدف المنتدى لتنظيم رحلات للاعضاء

مرحبا بكم فى منتدى مدرسة الصيد المصرية تنمنى دوام تعاونكم مع المنتدى فى نشر رياضة صيد الاسماك ونشر المعرفة حول طرق الصيد وتقنياته

دخول

لقد نسيت كلمة السر



المواضيع الأخيرة
» لهوأة صيد السمك البحر الاحمر
الجمعة أغسطس 21, 2015 9:59 pm من طرف mezo_9999

» صحيح البخاري لمستخدمى الايفون والايباد
الثلاثاء يناير 27, 2015 4:37 pm من طرف تخطى الحظر

» تنظيم رحلات الصيد فى النيل
الثلاثاء ديسمبر 09, 2014 2:38 pm من طرف أبو عبادة

» الصيد بالشلاف
الخميس ديسمبر 05, 2013 12:26 pm من طرف الفرماوي

» صياد قديم وجديد فى المنتدى
الأربعاء أغسطس 21, 2013 12:43 pm من طرف ابو إياد

» طريقة صناعة السالية Cast Net
الأحد يوليو 14, 2013 2:00 am من طرف jebaliridha

» هواية تعطيل التحول للديموقراطي
الخميس مايو 30, 2013 10:14 pm من طرف hurghadafisharman

» معسكر الاجازة الصيفية من اجياد
الإثنين نوفمبر 26, 2012 5:47 pm من طرف ركوب خيل21

» خدمات حجز اللنشات للصيد والنزهة في البحر
الجمعة أغسطس 31, 2012 8:21 pm من طرف hurghadafisharman

بحـث
 
 

نتائج البحث
 


Rechercher بحث متقدم

يناير 2017
الإثنينالثلاثاءالأربعاءالخميسالجمعةالسبتالأحد
      1
2345678
9101112131415
16171819202122
23242526272829
3031     

اليومية اليومية


أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

تغطية راس غارب الجمعة 28/11

استعرض الموضوع السابق استعرض الموضوع التالي اذهب الى الأسفل  رسالة [صفحة 1 من اصل 1]

1default تغطية راس غارب الجمعة 28/11 في الأربعاء مارس 18, 2009 8:37 am

madawbs


قبطان
اولا السلام عليكم ورحمة الله وبركاته وحمدلله على سلامتنا جميعا


بداية الوصف المختصر للطلعة

اعضاء الرحلة :
فريق حماطة الاستاذ مدحت والاستاذ هاشم ( دول محترفين )
فريق مصر الجديدة الاستاذ شريف رمضان والاستاذ عمرو والاستاذ هادى وجيه
فرقة ( اوعى وشك لا السن ييجى فيك ) احمد شكرى والعبد لله

المركب : 10 على 10 مركب جديدة وممتازة وفيها fish finder بس مااستفادناش منه كتير
الريس : البرنس محمد صلاح (ولما تعرفوه هاتعرفوا ليه برنس) راجل زوق جدا جدا وشاطر وهاتعرفوا حالا شاطر ليه وتقييمه 10 على 10
البحرية : كويسين وخدومين بس عملولى القهوة مظبوط وانا باحبها على الريحة علشان كدة هاديهم 9 على 10
المكان : بكر وواعد جدا جدا وهايقول كلام كبير بس نطلع وربنا هايكرمنا قوى

الوصف التفصيلى للطلعة :
بداية احب اوضح حاجة مهمة ان الثقة بين الصياد والريس بتاع المركب مهمة جدا جدا وهاحكيلكو حالا على كل حاجة.

هابتدى من قبل الطلعة باسبوع تقريبا بعد ماحجزنا المركب وكله تمام وقاعدين بنتابع الجو على windfinder.com & windguru.com وشوية الجو حلو وشوية هوا ومش عارف مين قلقان ومين مش فارقة معاه وطبعا الشكر كل الشكر لعضو المنتدى كريم لانه بصراحة تعب معايا جدا فى متابعة حالة الجو لانه بيشتغل فى شركة بترول وكان بيتصل بالفرع بتاعهم فى راس غارب يجيب لنا منه اخر التوقعات من الwither channel المدفوعة بتاعت الشركة وبرضه الريس سيد الى على مركب الملاح كان بيتصلنا بالناس الى يعرفهم فى غارب والزعفرانة يتطمنلنا على حالة الجو وبرضه فيه اكتر من حد بدون سابق معرفة اتصل بيا وقلقان جدا من ان الجو ممكن يقلب علينا وانا شاكر ليهم جميعا اهتمامهم وانا اسف ماقدرتش احفظ اسماء كل الى كلمونى لانى فعلا كنت عامل زى ماكون فاتح سنترال فى اول فيصل والله كان بيبقى معايا احيانا 3 كمالمات مع بعض وعمال اقلب على الـHold بينهم وانا بعتذرلهم تانى على الموضوع ده.

المهم جالى تليفون يوم الاربع بالليل من البرنس محمد صلاح ريس المركب وصاحب المركب (دا الى عرفته هناك) قال ايه البحر هايبقى عالى اليوميين الى جايين وهايريح على الاحد طبعا انا قلت فى عقلى باللى احنا بنتباع ياجدعان والجو ولا فيه حاجة والراجل تلاقى جاتله رحلة تانية هاتدفع اكتر او هاتاخد يومين ولا حاجة فقاللك نزحلق دول زى مابتحصل كتير جدا ... وهوب اتصالات مدحت باشا والاستاذ هاشم قاللى انا طالع فى اى جو (احتراااااف) وشريف وعمرو (بالمناسبة شريف ده ملك الاشتغالات عاوز واحد عينيه فى نص راسه وبرضه هاحكيلكم كمان شوية ) قالوا نتوكل على الله وطبعا احمد شكرى دا انا خاطفه اساسا مش طالع بمزاجه بس برضه الراجل ماعترضش على حاجة وسلم امره لله.

يوم الخميس كلمنى اخ فاضل من المنتدى وقاللى ارجوك الغى الرحلة وماتطلعش علشان هايكون فيه هوا جامد فقلتله احنا هانتوكل على الله وقبل ما نركب المركب هانقيم الوضع لقيناه هوا شديد مش هانطلع (وانا باشكره برضه على اهتمامه الى بدون غرض خالص واسف برضه على موضوع نسيان الاسم)

المهم الخميس بالضهر كله تمام عديت على اشرف فى الروضه جبت الطعم الراجل ماقصرش معايا بصراحا ولا خلف معايا المواعيد والطعم الى طلبته جه وبالسعر الى متفقين عليه تمام (ولو ان البرنس ماكانش عاجبه الطعم قوى بس كان شغال وكان عليه اكل كويس جدا) - ملاحظة برضه انا كنت جايب الطعم لكل واحد لواحده يعنى فلان عاوز كيلو كاليمارى و2 ماكريل ومش عارف ايه حاضر اكتب واكلم اشرف زود لنا 2 ماكريل وواحد كاليمارى دا كان غلط لان الطعم اتبقى منه كتير جدا جدا جدا يعنى كنا جايبين حوالى 15 كيلو كاليمارى وماكريل بالاضافة لحوالى 2 كيلو جمبر كانو عندى وكيلو سبيط يعنى 18 كيلو طعم كانو مقفلينلى الايس بوكس وسيبنا منهم للبرنس حوالى 13 كيلو . فبعد كدة الى يطلع يجيب للرحلة كلها الطعم ويقسم تمنه عليهم احسن هايوفر كتير

المهم يرجع مرجوعنا تانى لموضوعنا

الخميس اتقابلنا انا وشريف وعمرو فى المعادى عند اوتوبيس الجبلاوى ( وده فى حد ذاته اختراع هايل للى مش عاوز يتعب نفسه فى السواقة ويوفر كمان كتير ) الاوتوبيس ركبه شريف وعمرو على الساعة 10 تقريبا وتوكلو على الله وانا قابلت احمد شكرى على الساعة 12 وتوكلنا على الله والاستاذ هاشم اتحرك من مصر الجديدة على الساعة واحدة تقريباومعاه هادى والاستاذ مدحت وابتدا المشوار على راى حليم

وصلنا راس غارب على الساعة 4:15 تقريبا والله يكرمه سواق الاوتوبيس بتاع الجبلاوى وقف استنانا بعد الكمين فى راس غارب لاننا كنا كملنا بعد الكمين فى طريق الغردقة وده غلط ولفينا ورجعنا تانى مشينا ورا الاوتوبيس فى مدق لايمكن حد يحفظه بسهولة ( على العموم الى رايح بعد كدة يايركب الاوتوبيس ياما يقف بعد كمين راس غارب ويكلم محمد صلاح يجيله هناك )

وصلنا المرسى (وبرضه ميزة فى الاوتوبيس انه بيدخل لغاية 100 متر من الشط فحاجة ممتازة للى جاى من غير عربية مش هايشيل حاجته مسافة طويلة)

2default رد: تغطية راس غارب الجمعة 28/11 في الأربعاء مارس 18, 2009 8:38 am

madawbs


قبطان
اتجمعنا قعدنا نتابع الهوا كان فيه هوا شديد بصراحة وكان اتجاه الهوا ناحية البحر يعنى الى كان بيمشى ناحية البحر بيرجع تانى بصعوبة بس كان فيه صياد واخد على راس غارب قاللنا الجو هنا كدة دا الطبيعى بتاع المكان. المهم برضه قلنا احنا ونصيبنا وركبنا المركب ( هو لنش مش مركب وشكله جميل خالص) ركبنا عن طريق معدية خدتنا لحد عنده لانه مش بيدخل على الشط لان الغاطس بتاعه عالى شوية المهم توكلنا على الرزاق وخش بينا يابرنس على اول طرحة داخلين ياباشا والبحر عمال يعلى واحنا نتغرق ونتشقلط طبعا المحترفين جروا فى السكة وفيه حاجة خبطت مع الاستاذ هاشم بس فلتت تقريبا المهم كملنا على الطرحة وسق يا جدع المكان كويس اشتغلنا على الدرينى بس البحر كان قالب جامد وتعب ناس كتير بعد ربع ساعة ياللا يابرنس اطلع بينا على حتة هادية شوية رحنا على كنة كدة خدنا منها برضه درينى كفافى واحيانا بونجز كفافى وابو نقطة حجم عائلى كمبو بالبيبسى والسلطات وقعدنا شوية هناك للساعة واحدة تقريبا والكنة تقريبا كان الموج فيها كانه اعلى موج فى العين السخنة لما تبقى زحولة

اقتراح جميل من الاستاذ مدحت والعبد لله ان مادام الدنيا زحولة وكدة كدة الناس بطنها مقلوبة خلاص احنا نغامر وندخل جوة نتشقلط ويمكن حد يخبط سمك كويس وشدينا الرحال على جوة ورحنا طرحة مليانة بونجز كويس ومرجان بس ماخدناش ولا واحدة وربع ساعة بونجز وفأجة هجم علينا الخرمان لاخر اليوم يامعلم غير يابنى الوش وشيل التقل وعوم على وش المية ولم واضرب مش عارف اقوللكو على المتعة احجام ماشاء الله اطول من دراعك وتخانة كويسة وفيهم خرمان ابونقط ده الحجم العائلى من الخرمان واشتغلت مسابقة بين البرنس والمعلم مدحت الاتنين على الطبلية ولم ياجدع
ماشاء الله انا اظن ان الخرمان عدى فى العدد من 70 - 100 سمكة فى متوسط نص كيلو لكيلو وده الى وزن الرحلة شوية والناس كلها خدت بونجز كفافى كتير ( انا واخد حوالى عشرين ) و الدرينى كتير برضه الخمس سمكات يعتبرو كيلو خدت حوالى 20 - 25 سمكة

والبرنس طول الرحلة عمال يعتذر علشان الموج عالى ومش قادر يوصلنا للطرح الى كان عاوز يودينا فيها (درس مهم جدا اسمع كلام محمد صلاح فى حكاية المواعيد فى راس غارب بلا مناقشة وهو مش هايغشك بس اسمع الكلام تتبسط ان شاء الله وماتحددلوش يوم الطلعة قولله انا عاوز اجى الاسبوع الجاى وسيبه هو يحددلك اليوم قبله ب 48 ساعة ولما يقوللك الغى يبقى الغى وماتعصلجش)

وبعد ما خلصنا ورجعنا على الشط الساعة 5 ولمينا العدة شغل ياباشا الرز الى بالبصل والفلفل واقلى السمك واتغدينا غدوة ملوكى بالرحلة كلها وقعدة زى الفل مع ناس زى الفل (فاتتك ياشريف انت وعمرو لانهم اضطروا ينزلوا علشان يلحقوا الاوتوبيس)

دا ملخص الرحلة (سرك فى بير ياشكرى وماحدش هايعرف ان البنزين كان هايخلص منك واحنا راجعين علشان انت مرضيتش تحط من راس غارب وكنت عاوز تحط من الزعفرانه فطلع محطة البنزين الى فى الزعفرانة فى الصيانة ومافيش غيرها واننا قعدنا نلف ندور على بنزين فى نقطة الشرطة - الى برضه ليهم الشكر لانهم ساعدونا كتير وبعتو معانا البوكس يدور معانا على بنزين عند الناس الى ساكنة فى الزعفرانة لحد مالقينا عند واحد هو صحيح باعهولنا بالغالى بس اهو انقذنا والله وطبعا الشكر للاستاذ مدحت والاستاذ هاشم الى كانو عاوزين يروحو يجيبولنا بنزين من العين السخنة والله ناس زوق زوق زوق ....فضحتنا يا شكرى بس سرك التانى فى بير بجد مش هاقول عليه ..... الا لو الناس سألت عليه انت عارف انت حبيبى)


والحمد لله كنا فى البيت على الساعة 12 مساء الجمعة ولغينا فكرة البيات لان العملية ماكانتش ناقصة.


المهم المكان واعد والرحلة جميلة والصحبة هايلة والرحلة دى لازم تتكرر ان شاء الله وتكلفة المركب للفرد كانت ولله الحمد 121 المركب والاكرامية فكده تبقى مش كتير من وجهة نظرى (المواصلات والاكل والطعم مش فى الحسبة دى انا باتكلم على المركب بس )

وداعا العين السخنة اهلا راس غارب الى الابد (ماعدا مركب الملاح لانه حبيبى بس الواحد ممكن يطلع السخنة مع حد بيتعب او بيتعلم - وكلنا بنتعلم - ويقضى يوم ظريف ويرجع تانى )

نسيت اقولكوا على اشتغالات شريف بك رمضان قبل الرحلةكلمنى من نمرة غريبة وعمل نفسه واحد عاوز يطلع وربع ساعة كلام واسئلة على غارب والهو والمركب وفى الاخر انا شريف يابنى وبعديها راح طالبنى تانى من نمرة تانية وعملى واحد خليجى وهات يادش بالخليجى والرحلة ان شالله حلوة وايض وكلام من ده وانا اقولله اهلا بيك فى بلدك التانى واعتذرله علشان الاماكن اتحجزت وخايف السياحة تتضرب وابقى انا السبب (خصوصا ان كان فيه عضو فى المنتدى كان جاى من الخليج يقضى خمس ايام فى مصر انا افتكرته هو ده وقلت هايزعل مننا بقى ويقوللك انا جيت ومارضيوش يطلعونى معاهم بس الحمد لله جت سليمة وعملها فيا تانى لغاية مابقيت باشك فى مكالمات الناس الى عاوزة تيجى معانا فعلا. بس رديتهاله فى ساعتها فى موضوع الطعم - كلمته وقلتله اشرف بتاع الروضة الى كان هايجيبلنا الطعم حصلتله ظروف ومش هايجيب لنا حاجة --- هو كان قلقان من اشرف اساسا وانا لعبت على الحتة دى - وقعد يقول انا كان قلبى حاسس وانا الشيخ الشعراوى وحاجات كدة وبعدين لحقته قبل ماينزل يولع لاشرف فى المحل -


بس خلاص علشان صوابعى وجعتنى من كتر الرغى هاسيبكو مع الصور واعزرونى لانها مش صور كتير بس فى المخمضة الى كنا فيها كان صعب حد يفكر يطلع موبايل لانه كان ياما هايقع منه فى المية ياما هايتغرق مية من الطرطشة فاعزرونى والى لقاء فى رحلة قادمة ان شاء الله.

ااه الصور محتاجة تتشاف من الاخر للاول علشان الترتيب وشكرا هادى واستاذ مدحت واستاذ هاشم على الاكل الجميل (اصل انا وشكرى جبنا اكل للسمك ونسينا نجيب اكل لينا وحاولنا ننقذ الموقف بفول هارفست بس مالحقناش نفتح ولا علبة بس الجماعة قامو بالواجب وزيادة)

استعرض الموضوع السابق استعرض الموضوع التالي الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى